Cerita Bahasa Dayak

BADAK  GAGAL  PATEAH  SUNGEI 

(Inyusun : Emma Mihing)

      Sinde andau kuan anak haramaung dengan indu : “Mai, aku handak mandui akan sungei. Dia aku tahi mandui mai, hanjulu ih”.

      Kuan indu haramaung : “Ela tahi ikau mandui balimbur nak”.

      Kuan anak haramaung : “Yuh mai, hanjulu ih aku mandui, dia aku laya-laya awi balimbur”.   

      Kuan indu haramaung : “Takan ih ikau mandui amun kalute. Bingat ela laya-laya awi balimbur”.          

      Kuan anak haramaung : “Tulak mandui tuh kea aku mai”.

      Kuan indu haramaung : “Takan ih tulak mandui akan sungei te”.

      Anak haramaung mandui intu saran sungei. Kuan anak haramaung te kabuate : “Terai aku mancuba akan laut isut”.

      Laut jajalan laut anak haramaung sewu sungei te. Keruh kaluntu danum intu sungei te gawin anak haramaung te.

      “Aluh jatun kawalku mandui tuh, rami ih angate hanangui, tangui tapak kilau tuh”, kuan anak haramaung hung ateie. Tahi pandui anak haramaung te.

      Awi katahi mandui tepa darem bulu. Kuan anak haramaung : “Terai ih aku tuh mandui, jadi badarem bulungku tuh”, hayak ie buli manalih indu.

      Kuan indu haramaung : “Lalehan katahim mandui nak ? Tantani aku mentai ikau. Aku handak mimbit ikau mananjung manggau kare bua tungkui akan panginan itah. Ayu gulung nyadia arepem mangat kue gulung tulak”.

      Kuan anak haramaung : “Sadia ih aku jadi mai, ayu ih itah tulak”.

      Indu haramaung tatam-payah uyat anake, gitan jatun ati salinga. Kuan indu haramaung : “Kueh ie salingem nak ?”

      Kuan anak haramaung : “Tege ih salingku intu uyatku”.

      Kuan indu haramaung : “Kueh atun salingem intu uyatem kau, tau nihau awim metuh mandui nah”.

      Kuan anak haramaung : “Tutu kea, jatun salingku tuh mai”, hayak ie manggayap uyate.

      Kuan indu haramaung : “Ayu itah tulak akan saran sungei ekam mandui nah, itah manggau. Oo, badak. Duhup aku nger, duhup aku mampateah sungei tuh”.

      Kuan badak : “Kenam-pingku tau kare pateah sungei tuh, bara huran sampai wayah tuh kueh puji utus ikei tau kare pateah sungei”.

      Kuan indu haramaung : “Ela dia manduhup aku nger, puna nyame-nyame ih aku balaku duhup dengam pateah sungei tuh. Awi saling akem kau nihau leteng intu sungei tuh”.

      Kuan badak : “Kilen ampingku tau kare duhup ikau, jatun atun kuasangku tau pateah sungei tuh”.

      Kuan indu haramaung : “Duhup ih nger, te ikau mihup danum sungei tuh sampai teah. Mangat danum te dia balua te aku kareh manyumbel param mahapan palawi. Kalute caram man-duhup aku tuh nger”.  

      Kuan badak : “Amun tau kilau te, tau ih cuba-cuba aku manduhup ikau nger”.

      Kuan indu haramaung : “Lihiku ikau helu nger”.  Dia kapire katahi indu hara-maung dumah mimbit palawi hapan manyumbel paran badak te.

      Haramaung manyumbel paran badak sumbel bade-hen, inyumbel hapan palawi, hayak hamauh : “Has nger, nampara mihup ih ikau mampateah sungei tuh”.

      Badak nampara mihup danum sungei te, gitan danum sungei jajalan teah. Kanain badak sangkak kun-tep danum. Danum sungei teah, gitan ih kelep gayar garama.

      Kuan indu haramaung : “Panginan mangat ampi tuh, bujur te, lembut angat laun kanaingku manampayah kelep tuh”.

      Kuan kelep : “Kareh helu ikau kuman aku, alang-alang amun je kuman aku kabuat”.

      Kelep hadari manggau eka bakalindung manyahu-kan arepe. Metuh kelep mandari arepe te, hasundau ie dengan kalapiting.

      “Duhup nger, te hara-maung kau handak kuman itah. Duhup mengkak sumbel paran badak, gawin harama- ung kau, mangat danum haluli handalem”, kuan kelep dengan kalapiting.

      Kuan kalapiting dengan kelep : “Kilen ampin cara aku mengkak sumbel para badak kau nger ?”

      Kuan kelep : “Narai atun ngatip aka sumbel paran badak kau, sampai talapas bara para”.

      Hayak  sasahukan  kala-piting  lumpat nyarurui pain badak balalu mangatip mengkak sumbel palawi je gawin haramaung nah.  Tahi kea kalapiting te mangatip mengkak, kajaria sumbel paran badak te balawu, bengkak.

      Narai atun sana bengkak sumbel paran badak te, balalu mesu-mesur danum balua nyarurui rumbak para badak te. Haluli handalem sungei nah. Ancap kalapiting mandari arepe manalih sangere kelep.

      Kuan kelep : “Salamat itah nger, awi danum sungei tuh handalem haluli. Dia ulih haramaung madu manawan, kuman itah. Hanjak aku awi ulihum kea mengkak sumbel paran badak te”.

      Kuan kalapiting : “Puna rue-ruet sinde aku mengkak sumbel paran badak te sampai balawu bengkak”.

      Tarewen haramaung ha-ranan danum sungei salenga handalem haluli. Gulung haramaung mandari arepe akan saran tiwing.

      Kuan indu haramaung : “Puna sial kelep dia sampet dinun. Saling anakku dia sampet inggau. Haranan salenga sumbel paran badak kau bengkak”.

      Kuan badak : “Jatun nger, dia aku katawan auhku dengam. Dia ulihku mampa-teah danum sungei tuh akam. Tikas ampin kaulihku je kilau endau”.

      Kuan indu haramaung tumbah auh badak: “Yuh nger, pea aku tau manyalan ikau. Awi je puna tikas kaulihem manduhup”.

      “Ayu itah buli !”  kuan indu haramaung dengan anake. ***

 

Kutipan : Harian UmumDayak Pos

BAKATAK  JE  HUMUNG

 (Inyusun : Emma Mihing)

      Tege ije kungan anak bakatak kajuk-kajuka mara-jik arepe intu saran danau. Kajuk-kajuka sinde anak bakatak te pamanyi arep.

      Tarewen anak bakatak mahining salenga caur-caur lup lep auh bara padang kumpai intu saran danau te.

      “Hau”, kuan anak baka-tak te, “naraikah metu je lalau kahain bitie te ?” He-ngan anak bakatak manam-payahe.

      Kuan palanduk : “Oo anak bakatak, narai taluh je mampajungun ikau hikau ?”

      Kuan anak bakatak : “Aku nah hengan manam-payah metu je lalau kahai intu padang kumpai kau. Harungku tuh ih mite metu je kilau kau kahai”.

      Kuan palanduk : “Hau, diakah ikau katawa, metu je kau nah je bagare hadang-an”.

      Kuan anak bakatak : “Kai, hadangan aran metu je hai kau. Terai, buli ih aku tuh palanduk. Aku handak mansanan akan induku atun metu hai je bagare hadangan. Buli ih aku tuh”.

      Kuan palanduk : “Takan ih ikau buli, ela lalau laya-laya benteng jalan. Gulung ih ikau buli, kareh tahi indum mentai ikau dumah”. 

      Kuan anak bakatak : “Dia hirah induku ridu, awi aku tulak basanan denga”.

      Kuan palanduk : “Yuh, aluh kalute bahalap ikau gulung buli. Eweh tawa mikeh tege kare taluh rentah ikau manggawi”.

      Kuan anak bakatak : “Buli aku tuh”.  Kajuk-kajuka anak bakatak malihi saran danau te. Dia pire katahi sampai ie akan eka ewen due hindu te.

      Hayak ngis nges auh tahasenge, anak bakatak bakesah akan indu : “Intu saran danau enah atun ije kungan metu hai. Hai tutu metu te. Saumur belum harungku puji mite kahain metu kilau te. Kuan palan-duk metu te bagare hadangan”.

      Kuan indu bakatak : “Kilen kahai metu te bara aku nak ?”

      Kuan anak bakatak : “Hai metu te, hai tutu. Narai atun je kahaim kau mai, sapersaratuse mahin dia”.

      Indu bakatak manyanam arepe, hayak hamauh : “Kilen kahai bara aku tuh nak ?”

      Kuan anak bakatak : “Ceh mai, ngahai tunjike mahin dia ikau kau mai”.

      Kuan indu bakatak : “Dia narai kahai, helu aku pahai arepku tinai”. Bulat bulali kahai kanain bakatak te.

      “Kilen kahai bara aku tuh ?”, kuan indu bakatak tinai.

      Kuan anak bakatak : “Kahai ikau kau mai, baya ngahai tunjik hadangan te bewei”.

      Indu bakatak pahai arepe, hayak kaabas manyanam arepe, limbah te ie hamauh : “En atun kahai ngahai aku tuh ?”

      Kuan anak bakatak : “Jatun ati kahain hadangan kilau kau, puna hai hadangan te. Hai tutu, saratus kali kahain kau mai mahin magun kurik”.

      Kuan indu bakatak : “Lalehan kahain metu je kuam kau”.  Ie balalu manyanam hindai mangat tau labih hai.

      Kuan anak bakatak : “Magun kurik kilau kau mai. Hindai bewei kahai mai”.

      Bakatak balalu basanam hindai, limbah te ie misek anake tinai : “Kilen kahai bara aku tuh nak ?”

      Kuan anak bakatak : “Jatun rima je kahai kau nah mai, hindai bewei kilau kahain hadangan te. Hai tutu hadangan te, dia aku tau mangesah ih kahain hadang-an te. Hai hadangan te, hai bara kambing, hai bara bawui. Amun kilau kau kahaim mai, harun ngahai anak manuk ih”.

      Kuan indu bakatak : “Tuh aku pahai arepku tinai”.  Bakatak manamean riwut are tutu akan kanai sampai maliting, bulat kilau lauk buntal enyuh ampin kanai.

      “En ulih kilau tuh kahain hadangan te ?”, kuan indu bakatak tinai.

      Kuan anak bakatak : “Hai bara kau, jatun tataluh je kahain kau mai”. 

      Bakatak mampahai arepe sapire kaulih, ie manyanam arepe mangat kanai manga-lata. Tapi awi bakatak te paham manyanam arepe, pea dia balalu manyalentup kanain bakatak te.

      Kalute ampin bakatak je kurik te, handak manyama arepe dengan hadangan je hai. Ganan kahumung bakatak te, kajaria mimbit pampateie.

      Anak bakatak tarewen mahining auh salentup kanain indu. Ie manangis awi indu matei tuntang ie je jadi nule.

      “Manyasal aku mange-sah taluh maca-macam akan induku. Jaka aku dia bakesah tahiu kahain hadangan aka, dia baka ie matei kilau tuh”, kuan anak bakatak masi arep.  ***

Kutipan : Harian UmumDayak Pos

BAKEI  JE  HUMUNG

(Inyusun : A. F. Nahan)

      Jaman huran kalunen dengan bakei tau hapander tuntang tau hapakat bagawi. Tapi puna kalunen dia rajin dengan bakei, awi gawia je bakaraen dengan ramun uluh tuntang tau manakau.  Awi te kalunen dia maku ije kakampung dengan bakei.  Kalunen mawi eka ayu kabuat tuntang bakei mawi kampung ayu kea.

      Atun ije biti bawi balu dengan ije biti anake hatue melai tukep kampung bakei. Aran anake te Uder. Ie te panumun tuntang rajin bagawi manduhup indue. Ewen due belum malan parei tuntang kare ramun dawen kayu kilau saretak, lempang, lumbuk, sahang, terung, rimbang tuntang macam-macam sayur je beken.

      Tapi saparu bewei je ulih ewen mangkeme hasil, awi kawan bakei je jatun ati mimbul taluh nara-narai, harajur manakau tuntang marusak taluh imbul ewen. Laya isut ih dia mite tana tuntang taluh imbul, te kawan bakei dumah mamutik bua saretak, rimbang, lumbuk, tuntang mulit parei ewen. Jatun ulih sama sinde malihi tana tahi tutu, haranan bakei harajur bakaraen.

      Sinde andau ewen due hanak lepah balut. Kuan indu Uder : “Has nak,  keleh ikau mamisi, awi itah lepah balut andau tuh. Male aku mite tukep eka ewen bakei, are tutu tungap lauk, hai kurik. Mikeh bahalap hirah ikau mamisi hete”.

      Tumbah Uder : “Tau ih, mai”.  Ie palus manatap pisi tuntang umpa.  Tapi ie dia maku mangali handalai akan umpan awi ie bajilek. Ie manduan kanain manuk matei rungkuk.

      “Tulak aku tuh mai”,  kuan Uder sana taluh handiai uras tatap. Ie palus lumpat arut kurik. 

      “Iyuh nak, bua-buah ih intu kanih kareh. Ela rajin hatangkenya dengan kawan bakei te”, kuan indu Uder, sambil manduhup mengkak lawak arut akan Uder. 

      Uder masuh tukep lewun bakei tuntang bajarat hete. Ie malabuh pisi tuntang mentai lauk manutuk. Tapi jatun ati lauk maku manukep tuntang manutuk pisi te, awi kawan bakei paham ridu. Tengah belah bakei te mangusau danum tukep eka Uder mamisi.

      Je beken manggerek edan tandipah eka Uder malabuh pisi tuntang kariak kalaluk. Uder benyem ih, manyarenan angat kasangit tuntang sabar mentai lauk dumah manutuk pisie.  Tapi atun je mambisau ie tuntang mawi ie rahas.

      Genep ewen te mahalau, harajur misek ie : “Narai umpam, Der ?”   Sulak Uder tumbah bahalap ih : “Umpan kanain manuk matei rungkuk”.

      Limbah jete dumah tinai je beken misek ie : “Narai umpam, Der ?”   Tumbah Uder bahalap : “Umpan kanain manuk matei rungkuk”.

      Tapi dia tahi tinai limbah te dumah je beken misek : “Narai umpam, Der ?”  

Uder tumbah bahalap : “Umpan kanain manuk matei rungkuk”.

      Dia tahi tinai dumah je beken misek umpan Uder.  Maka Uder hamauh :  “Terai misek aku hal jete tuntang ela manderuh aku mamisi. Kilen ampi lauk maku tukep amun ketun raju-rajur ridu tuntang misek aku”.

      Tapi puna hadat bakei dia maku jera tuntang badungil. Ewen dumah misek Uder tuntang manderuh ie mamisi. Kajaria Uder rahas tuntang manumbah papa auh : “Umpan kanain indum tuntang takuluk bapam”.

      Mahining auh jete kawan bakei rahas kea. Ewen marusak pisin Uder palus manawan ie tuntang mimbit akan human ewen hayak manjarat ie intu bentuk huma. 

      Ije alem Uder melai hete. Maka hanjewu andau te ewen misek ie : “Narai nupim, Der ?” 

      Tumbah Uder : “Narai ati, pea tau nupi, batiruh mahi aku dia tau. Ketun raju-rajur lulang luli mahalau aku intu hetuh, hayak kerokarua ridu tutu”.

      Kuan bakei sama arep  : “Bujur kea auhe te. Keleh indah ie akan balikat atep baun tunggang je hai alem kareh”.  Ewen balalu mindah  Uder  akan  balikat  atep  baun  tunggang  je hai.  Alem je kadue Uder atun hete.  Maka sana sawah andau, te kawan bakei misek ie : “Narai nupim alem endau, Der ?” 

      Tumbah Uder : “Eweh je tau batiruh   hung   eka  je  kalute ?   Mahi-mahin tinai je nupi. Kilau kueh aku tau nupi ?  Amun baun tunggang harajur mahiau rut ret, awi ketun paham balua tame”.

      Te kuan bakei tinai : “Hau, bujur kea auhe te.  Keleh manenga aka jangkut tuntang birang amak tuntang tenga bantal gaguling aka. Nauh ih ie batiruh huang sarambi balikat kanih”.

      Kalute ewen manatap akan Uder leka batiruh je mangat huang alem katelu. Sana sawah, te ewen bakei misek ie tinai : “Mangat hirah tiruhum. Narai nupim alem endau ?” 

      Tumbah Uder : “Tutu mangat tiruhku alem endau, awi eka batiruh bahalap.  Aku nupi bua sangalang masak tutu hung saran tanan indangku”.

      Mahining auh te bakei hamauh : “Tutukah te ? Keleh itah akan kanih, mandai bua te palus kuma”. 

      Tumbah Uder : “Tau bewei, tapi hung kanih kareh itah mamumpung kayu manuyuk hakaliling upun bua te, karana nyamuk paham tutu hung taruke.  Bahali tutu itah kuma, amun marak are nyamuk mamepet”.  Maka lepah ije kahuma ewen bakei tulak,  batisa ije kungan bakei bawi je batihi tuntang handak luas.  

      Sana sampai maka ewen bakei mamumpung kayu palus manuyuk hung upun bua sangalang. Awi bitin ewen puna are, tuyuk kayu te gantung haliai tuntang lumbah. Limbah Uder mansanan umbet mawi tuyuk kayu, maka kawan bakei te hasanselu mandai batang   bua sangalang  te.  Puna bua te masak tuntang lenda-lendang ampin tampayah.

      Kawan bakei hai kurik hakarabut mandai,  handak mamutik helu tuntang kumae.  Metuh ewen rami hung taruk upun bua sangalang maka Uder mamehun tuyuk kayu te. Apuie sasa-sasar hai. 

      “Ngurang isut, Der !”, kuan bakei hunjun.

      “Yuh, tuh aku rahat manguranga”, tumbah Uder, palus mandahang tuyuk kayu te tinai.

      Pehun te sasar hai tuntang tayap penda bua sangalang te. Nyala sasar gantung sampai kare bakei tarapaksa malabuh arepe akan penda  tuntang  buah  apui  palus  matei  bakehu.   Mije-mije  ewen  te manjatu akan penda palus buah apui tuntang kajaria lepah uras matei bakehu. Baya tisa ije kungan bakei bawi huang huma je awi batihi dia umba mandai sangalang.  Jete bewei mawi paung bakei sampai wayah tuh.

      Indu Uder huang huma jari katelu andau manunggu anake buli, tapi Uder hindai ati dumah.  Te ie masuh hapan jukung akan ngawa tuntang supa Uder kurikuringkunyuh limbah dumah bara tana. Ie misek narai buku anake tahi dia buli huma. Te Uder manyarita je ie karenga dia patei awi bakei tuntang bua sangalang lepah kinan bakei hayak bakei kea lepah lingis matei buah apui pehun.

      Indu Uder sanang ateie mite anake belum. Ie buli tinai mambesei kabuat awi Uder rahian dengan jukung ayu kabuat.  Tandipah eka bakei ie mite ije bawin bakei te sirusirut manangis.

      “Mbuhen ikau manangis, antai ?”, kuan indu Uder misek.

      Tumbah bawin bakei sene-seneng auhe : “Katulas anakem, Uder te. Lepah biti aran ikei matei awi”.

      “Mbuhen ?”, kuan indu Uder pura-pura badengen, “tuke-tukep hetuh mangat aku mahining hayak barendeng”.

      Kuan bawin bakei tinai : “Gawin anakem, Uder kau, lepah anak jariangku tuntang kabalingku matei awi”.

      Kuan indu Uder tinai : “Mbuhen ? Dia barendeng aku mahining, kan hetuh, tuke-tukep isut. Narai kuam enah ?”

      Bawin bakei te sasa-sasar tukep hayak hamauh sapa-sapa tagal kare uluh ayu lepah matei.  Mite bakei te sasa-sasar tukep, te indu Uder mahampas baun bakei te hapan besei.  Karas tutu hampas indu Uder te, sampai urung bakei lemek kilau uluh je rungung urunge.

      Bakei hadari bara hete dengan urung je lemek tuntang jete manurun tinai palus anak jaria, sampai katika jetuh. ***

Kutipan : Harian UmumDayak Pos

BAKEI  NYAMBAR  BAJAI 

Inyusun : Emma Mihing)

      Bakei manga-mangat tuyang tayun bara upun kayu ije akan upun kayu je beken. Aluh are jadi upun kayu je inalih awi bakei tapi kare upun kayu te uras kanjeran helat mamua.

      Kuan bakei : “Jatun amun kilau tuh, tau je balau aku tuh”.

      Tapi aluh kalute awi je puna palakun kanai balaku suang, aluh marak kakulase bakei tatap ih tuyang tayun bara upun kayu ije akan upun kayu je beken, aya-ayau atun ampin rajaki. Je kajewu gawin bakei kilau te, tapi ije kabawak bua je tau akan indu kina mahin jatun dinun.

      Bakei magun malajur jalana hanterap bara upun kayu ije akan upun kayu beken.

      Kuan bakei : “Heka angatku, nauh aku batahan manyarenan angat kahekaku helu”.

      Bakei manyantah arepe hung ije edan, te kanai ma-ngaruncung auhe : karuruk – karuruk – karuruk – karuruk - karuruk – karuruk. Buk bek – buk bek – buk bek.

      Kuan bakei huang ateie : “Kilen ampi amun harajur belum kilau tuh, dia baka balang gulung matei”.

      Pehe atei bakei maniruk ampin nasib je kanjeran naripi awi lau kilau tuh. Bakei mariaran mata akan dipah sungei, mite intu dipah gita atun bua je tau akan indu kinan. 

      Kuan bakei tinai huang atei : “Ceh, jaka aku tuh ulih dimpah akan dipah silan sungei tuh, besuh kea kanaingku tuh. Tege ih ampi bua je tau akan indu kinan intu kanih”.

      Ture-ture ih bakei mananture bua intu dipah silan sungei te. Jaka sungei te kurik bahanyi ih bakei selang hanangui dimpah, tapi awi sungei te hai marawan kea angat bakei handak hanangui dimpah.

      Kanjeran bakei huang kabembang kilau te salenga taragitan atun sabaru intu saran tiwing.

      Bakei balalu mantehau sabaru : “Oo nger, narai gawim intu hikau ?”

      Kuan sabaru : “Aku tuh nah mangarangka arepku handak dimpah akan dipah silan sungei tuh.  Tawam ih awi ampi intu silan hetuh nampara bahali manggau kare ampin taluh je tau kinan”.

      Kuan bakei : “Hau nger, lehan auh kasama tiruk kue, aku tuh mahin handak dimpah kea. Awi sama kilau kuam nah, kare bua je tau akan kinan intu dipah silan tuh jadi nampara mahawis. Ije kajewu tuh aku jadi tuyang tayun bara upun kayu ije akan upun kayu beken, tapi puna jatun atun taluh dinungku, baya heka bewei”.

      Kuan sabaru : “Puna ih nger, ara itah je bausaha. Tau kea kanateke jatun dinun taluh en-en. Tapi nger, amun itah tatap bausaha, tau ih kanateke dinun rajaki je naniha. Kilen nger, puna tutu ikau je handak dimpah akan dipah sungei tuh nah ? Amun puna atun tirukem kalute tau kue haya-hayak dimpah nger. Mangat kea amun itah tege kawal hanangui”.

      Kuan bakei  :  “Puna ka-lute je adu, baya bewei je inirukku tuh taluh hapa dim-pah te je jatun. Narai je huangku, jaka atun taluh hapaku dimpah puna je aluh tuh mahin narai kea kasala, labih gulung tau dimpah labih bahalap nger”.

      Kuan sabaru : “Puna jikau kea je inirukku nah nger. Aku tuh ulihku ih je tarawang amun dia kejau, tapi je dimpah sungei tuh puna malar kea kakejau”.

      Metuh kanjera bakei ewen due sabaru rami bapander mangarangka arepe dimpah, salenga guta-gutang bajai mampalampang arepe bara huang danum.

      “Hau nger”, kuan bajai, “Narai je rami imander ketun due nah, asyik tutu ampi. Amun je tau mimbit rajaki imander akangku, mangat itah uras tau habagi rajaki te. Ela je dia bingat aku nger, awi sama pehe ampin usaha wayah tuh”.

      Kuan sabaru : “Je kue sangerku bakei tuh rami pander-pander nahiu ampin kasusah ikei, mamander ampin kare taluh kinan je tipus nahapas tuh, awi ganan pandang je hai tuh, kare ampin bua uras tarau lepah baduruh, tuh nah je imander ikei. Ikei tuh rami mamander kasusah ikei ih, jatun taluh je imander beken. Awi te ikei due tuh mangarangka handak dimpah akan dipah sungei tuh. Ije manjadi halangan akan ikei awi jatun taluh hapan ikei tuh dimpah”.

      “Amun ketun due je handak dimpah akan silan sungei tuh, amun ketun nahuang tau ih ketun due pahayak aku tuh, awi aku tuh puna tege hajat dimpah kea. Muhun ih ketun due, lumpat akan hunjun likutku tuh, tau ih itah dimpah”, kuan bajai.

      “Te nger, tege tawaran sanger itah bajai, en jadi kea ikau dimpah nah bakei, mangat kue pahayak bajai tuh”, kuan sabaru.

      “Dia aku je kare balang, narai kea je entai itah intu hetuh ? Amun itah tatap mentai intu hetuh dia balang matei balau itah tuh. Oo sanger bajai, hampea ikau basadia magah ikei tuh”, kuan bakei.

      Kuan bajai : “Je aku tuh aluh tuh sadia ih, mana kuan ketun due ih. Amun kuan ketun due metuh tuh, muhun ih munduk hunjun likutku tuh, nauh aku mambesei ketun due dimpah akan silan sungei tuh”.

      Bakei ewen due sabaru muhun balalu munduk hunjun likut bajai.

      Kuan sabaru : “Aku hila baun nger, awi aku tuh mambirang layar mangat itah gulung sampai dipah sungei tuh”. Sabaru balalu depe-depe mambirang palapase, hayak te kea mantehau riwut.

      “Kuris, kuris, kuris. Krah, krah. Kirah, kirah”, kuan bakei.

      Pihi-pihit laju tangui bajai, hanjak bakei ewen due sabaru. Sana sampai bentuk sungei, narai atun bajai balalu paleteng arepe, sabaru tarawang, bakei nah tangui tapak.

      Tuh ie panginan mangat je ientaiku bara endau kuan bajai huang ateie, jatun  atun  ampun  tinai balalu bajai te manyambar manungap ba-kei. Gulung bajai mimbit hantun bakei te akan saran sungei. Intu penda tewai saran tiwing, bajai pesta museh kuman bakei te.

      Tuh manjadi pampingat akan itah ela barangai par-caya auh bujukan manis uluh je auhe handak manduhup, tapi dia je manduhup sabu-jura, tapi handak mangaruk kauntungan aka, dengan mancalaka ikau.

      Awi te rende-rendeng ela helu parcaya auh uluh, mi-keh berengmu calaka, sama kilau nasib bakei tuh. ***
Kutipan : Harian UmumDayak Pos

BURUNG  KAK  TUNTANG PALANDUK

(Inyusun : A. F. Nahan)

      Burung kak rajin kuman kare hantun metu, lauk tuntang kare taluh je maram. Hung kueh atun hantun taluh maram, hete atun burung kak rami murep.

      Sinde katika burung kak sundau hantun badak hai tutu. Te ewen rami tutu murep jete genep andau. Awi hantun badak te puna hai tutu, maka burung kak dia ulih palepah jete bajeleng. Genep andau ewen dumah akan hete kuman hantun badak te tuntang bitin ewen sasar are dumah akan hete.

      Tukep leka jete atun palanduk murep bua karahuang je manjatu bara eda. Tapi bua je manjatu dia ulih sukup akan panginan palanduk. Tagal jete puna genep andau palanduk mangkeme harajur balau awi puna dia sukup panginan. Bara kejau ie mite kare burung kak muhun mandai tarawang, rami tutu ampi.

      Ie mangguang eka te tuntang manyelek narai je iawi kawan burung kak hete. Te gita atun hantun badak hai, tapi ie mangira panduku petak gantung, awi jete tire-tirem ampin tampayah. Ie hengan mite burung kak te kalute kare tingkep hung hunjun panduku petak gantung te. Awi te ie manukep jete tuntang harun ie keme ewau maram. Te kua hung atei : “Tuh ie je inesek awi kawan burung kak. Ewen kuman besuh intu hetuh genep andau”.

      Palanduk lembut kahirin atei dengan burung kak, mite ewen harajur besuh kuman, padahal palanduk genep andau dia puji besuh kuman. Bua karahuang je ientai manjatu baya isut bewei, dia sukup akan kinan palanduk.  Te palanduk mangarangka taluh papa akan burung kak. Ie maramu gita sambulut are tutu, palus muhus jete hung bitin hantun badak  te  sukup kare,  katika kare burung kak terai murep tuntang buli akan eka. Limbah te ie manyahukan arepe tukep hete, mite kajarian gawi te.

      Andau tinai burung kak rami dumah murep kilau bahut, kuman hantun badak te, tuntang dia katawan taluh je papa jari iuhus palanduk akan ewen. Ewen tingkep hunjun hantun badak palus kuman, tapi amun ewen handak tarawang tinai, salenga palapas ewen leket hung hantun badak te.

      Hantun badak bilak dia gitan tinai awi kuntep dengan burung kak je dia ulih tarawang tuntang leket intu hete. Rami tutu burung kak ridu, tagal taluh je buah ewen kalute. Tuntang palanduk manampayah taluh handiai bara eka sahukan.

      Umbet katahi palanduk balua bara eka sahukan tuntang hamauh, pura-pura dia katawan : “Mbuhen ketun ?  Narai mawi ketun dia ulih tarawang tinai tuntang palapas ketun kepe-kepek hunjun taluh je maram hikau ?”

      Tumbah burung kak : “Eweh kea je tulas tutu gawi dengan ikei kalutuh ?  Ikei jari mangat kuman intu hetuh, tapi atun uluh je muhus gita sambulut intu hetuh. Keleh duhup ikei antai, maka ikei tau kea malalus taluh bahalap tinai akam !”

      Kuan palanduk : “Tau bewei antai ! Aku akan malapas ketun handiai bara gita sambulut hikau. Tapi keleh hajanji dengangku. Amun ketun lapas, te ketun manduruh bua karahuang je jari masak kanih”.

      Tumbah burung kak : “Jete dia bahali ikei mangua. Keleh ikau bajeleng malapas karen ikei bara taluh celaka tuh”.

      Mahining auh jete palanduk haguet manggau undus tuntang mimbit jete haluli talih burung kak. Ie muhus bulun burung kak te mije-mije mamparasih bara gita sambulut, sampai bulun burung kak te malisen tuntang babilem malihup, mangilat ampin tampayah.

      Hal jete mampahanjak burung kak karana gawin palanduk te mawi ewen tambah bahalap tuntang bakena ampin tampayah. Sana kare ewen burung kak lapas, maka ewen rami-rami tinai manduruh bua karahuang akan palanduk.

      Bara katika jete palanduk kuman besuh tuntang sukup taluh iurepe bara bua karahuang. Ewen due kea bara katika jete hasobat tutu. Amun kara-huang mamua tuntang masak, te burung kak murep jete tuntang manduruh, tuntang palanduk musti atun hung penda kuman bua je baduruh.  ***

Kutipan : Harian UmumDayak Pos

DIA  PARCAYA  KAMBE

(Inyusun : Emma Mihing)

      “Has indu Palui, jewu itah akan hulu sungei ngaju lewu tuh mambuka himba je uluh dia bahanyi mambuka te”, kuan pa Palui.

      “Aku dia satuju pa Palui, tawam hete nah, tege kambe taluh manunggu. Uras uluh lewu mangesah”, tumbah indu Palui.

      “Ceh indu Palui, aku dia parcaya je kambe taluh te atun, baya kesah bewei”, kuan pa Palui tinai.

      “Ela itah je dia parcaya pa Palui, mikeh tutu kuan ewen te”, auh indu Palui.

      “Dia indu Palui, aku jadi mariksa petak hete petak bahalap, petak subur”, kuan pa Palui.

      Pea dia, manungkang andau pa Palui ewen telu hanak tulak mandirik maneweng, mambuka himba te. Pa Palui hayak mandirik maneweng sambil kea minti-mintih kayu je tau akan manampa pasah. Sapau pasah te mahapan dawen tingen. 

      Kalute sining andau pa Palui ewen telu hanak tulak akan tana, amun halemei ewen buli akan lewu. Pasah pa Palui jadi mendeng kea, eka ewen manyandehan amun intu tana.

      Bahalap tanan pa Palui te, subur hayak hasien pareie. Tapi sayang, are tutu ampit dumah murep taluh imbul pa Palui te.

      “Terai, itah masan intu tana ih indu Palui”, kuan pa Palui.

      “Dia aku bahanyi pa Palui, hiningem je are kambe intu hete. Ela itah dia parcaya auh uluh te. Aku mikeh pa Palui,   aku  mikeh   itah  karap  kambe kareh”, kuan indu Palui tumbah.

      “Auh uluh ih indu Palui, jatun atun kambe te. Diamen indu Palui, kambe te mikeh dengangku. Amun tutu tege kambe, aku manyupek uyate te”, kuan pa Palui.

      Sabujure pa Palui te dia je bahanyi tapi auhe te awi kahumunge, awi dia ie katawan narai je kambe te, tuntang dia puji pasuru ie.   

      Tapaksa kea indu Palui manyadia ampin behas bahata, manyadia jangkut amak hapa tulak masan akan tana. Asu tuntang pusa, imbit ewen kea masan.

      Awi pa Palui ewen hanak harajur tege muhah ampit, te ampit dia lalau bahanyi murep parei ewen. Rajin tutu pa Palui ewen hanak mite ampin pareie, metuh te kanjera kasak maru. 

      Kilen hung ije alem, asun pa Palui batiruh intu saran baun tunggang. Awi pasah te balaseh upak, kihi-kihir kawi-kawit ikuh asun te balua kapenda.

      Alem te kambe hamauh dengan sawae : “Ayu ndu alem tuh itah akan eka pa Palui kau. Hiweh jadi belaiku handak kuman kalunen. Itah mamisak marabit ewen telu hanak”.

      “Ayu”, kuan kambe bawi, “itah mananjung te sele-selek ih mangat pa Palui dia katawan itah dumah akan pasahe”.

      Bakalis tutu tiruh pa Palui ewen telu hanak, mahining auh keruk pa Palui hagaruntung sinde. Hatatum-bah keruk pa Palui ewen due anake Palui.

      “Hiningem auh keruk pa Palui ?”, kuan kambe je hatue dengan kambe je bawi.

      “Hiningku, mangat itah mampatei pa Palui ewen telu hanak metuh kanjeran tiruh tuh”, tumbah kambe je bawi.

      Kambe ewen due te manggau jalan kueh ewen tau tame huma, ewen mang-gau cara muap baun tung-gang.

      Ingutip kambe je bawi kambe je hatue hayak hama-uh : “Ite, narai je kihi-kihir helat laseh hayak kawi-kawit te antai ?”.  

      “Ikuh acu (asu)”, kuan kambe je hatue bisi-bisik.

      “Ulang icau (pulang pisau)”, kuan kambe je bawi hayak bisi-bisik kea, “ijit ite (jijit mite)”.

      Injijit awi kambe je hatue taluh je kihi-kihir te, manjijit ikuh asu. Pea dia, kai-kaik asu te mangaik awi tarewen, hayak mangang jua-juan.

      Pa Palui tarewen misik balalu manduan lunju, mam-belas bara helat rumbak laseh. Lengen kambe je bawi bahimang buah lunju pa Palui te.

      “Ancap itah buli, ancap hadari, bahimang lengengku awi punu mambelas lunjun pa Palui te”, kuan kambe je bawi.  Batap-baning darin kambe ewen due te, manan-tarang jihin pasah. Hatuguh tuyang-tayun pasah pa Palui awie.

      Palui ancap majuk parae hapangku dengan indue. Pa Palui manampayah kambe hadari bara petuk dinding. Sana kambe jadi hadari kejau, harun salawah  huang   atei  pa  Palui.  Asun ewen juju-juan mangang bara huang pasah, tuntang pusa mangiau juju-juan kea.

      “Te nak”, kuan pa Palui, “pea hureh auhku, kambe te mikeh dengangku. Nampa-yah lunju tuh, gitan ketun tege dahan kambe hetuh”.

      Jera kambe manderuh pa Palui, tuntang kajaria ie parcaya kea je kambe te atun. Kesah pa Palui sinde tuh, keleh manjadi suntu akan itah. Amun atun bahaya je manimpa itah manyalenga, itah patut barendeng.

      Pa Palui aluh marak rampa-rampa ie dia bingung, gulung ie manduan lunju bara seruk baun tunggang hapa mampartahan arepe.

      Kambe te tutu ie gan-cang ganas, tapi kalunen magun ulih mampakalah kambe awi kalunen tege akal pikire.

      Awi te sampai wayah tuh sabujure kambe te mikeh dengan kalunen tuntang asu, pusa. Kadue metu te jadi kawal je tukep dengan kalunen.  ***

Kutipan : Harian UmumDayak Pos

HAKABEKEN  RAJAKI

(Inyusun : Emma Mihing)

      Huran atun ije kaluarga, je belum sanang mangat ih. Kaluarga te baya manak due biti ih, uras bawi. Je bakas bagare Putir Awi tuntang je busu bagare Putir Busu. Kadue anak te hakabeken ampin parangaia.

      Putir Awi rajin tutu dengan kare taluh je rami-rami, intu kueh tege kare krasmin, karamin pesta uluh harajur ih ie atun panggil intu hete. 

      Atun je Putir Busu mantu-mantuh ampi mawi arepe, dia ie rajin je hihi haha kilau kaka Putir Awi je paham bajelap te.

      Amun jadi inyuhu indu ewen due bagawi : te je Putir Awi, kareh baka kareh ih je auh tumbah, aku tuh kanje-rangku manggawi mampaja-di taluh gawingku tuh. Tepa dia tapagawi taluh parentah indu te.

      Beken je Putir Busu, amun indu marentah ie, te ie balalu harikas mendeng manggawi narai je parentah indu te, nauh kareh ie mampajadi taluh gawi je rahat inggawie te.

      Kilen sinde andau, Putir Busu awi jatun kea taluh je iawi intu hanjewu te, ie tanju-tanjung mananjung akan likut lewu. Eweh tawa mikeh tege kare kulat naniha akan juhu bentuk andau kareh. Kilen salenga tapasala jalan je nyarurui te, tasarurui jalan akan human ije biti bawi bakas. Metuh te bawi bakas te kanjera mambawau marasih kare kabun pisang – tewu intu baun huma te.

      “Hau, tege uluh bawi bahalap ampi tuh, handak akan kueh ikau tuh esu ?”, kuan bawi bakas te.

      Kuan Putir Busu : “Oo embi, ihatku tanju-tanjung aya-ayau atun pasuru kare kulat, naniha akan juhu bentuk andau kareh, te auh karaen gawingku nah embi”.

      Kuan bawi bakas te : “Bahalap kilau te esu, itah tuh belum narai bewei taluh je tau inggawi, inggawi ih ela lalau je intih-intih dengan kare taluh je inggawi. Tende maja esu, palus lumpat akan pasahku tuh”.

      Lumpat kea Putir Busu maja pasah uluh bawi bakas te, je bajenta tutu auh pan-dere te. Sulaka bakas te ma-ngesah ampin kahalap kabun pisang tewu je ngaliling pasahe te.

      Limbah te kuan bawi bakas te : “Kilau sala paisekku dengam esu, en pire biti ketun hampahari ?”

      Kuan Putir Busu : “Ih tambi, ikei hampahari tuh baya badue ih, uras bawi ikei due te. Aku tuh je busu, awi te arangku inyewut uluh Putir Busu tuntang kakaku te bagare Putir Awi. Kakaku Putir Awi tege ih melai huang huma”.

      Kuan bawi bakas te : “En esu tau hirah amun ikau buli manduan kakam Putir Awi te ? Awi aku tuh handak malelei manenung ampin rajakin ketun due kau esu”.

      “Narai kapali tambi, nauh aku buli helu manduan kakaku Putir Awi te”, kuan Putir Busu.  Dia pire katahi, dumah Putir Busu ewen due Putir Awi.

      Kuan bawi bakas te : “Aku tuh handak maningkes ketun due esu”.

      Kuan Putir Awi : “Yuh, tambi. Kilen auh tingkes tambi te mangat ikei sama marima, sama manggau ?”

      Kuan uluh bawi bakas je te : “Tuh esu, intu hetuh atun maca-macam ramu je batatai hakalampah tuh. Gawin ketun due manyumput sama mije bara barang je tege intu hikau, barangai ih manumun kahian atei ketun masing-masing”.

      Putir Awi manyumput besei baludang, Putir Busu manyumput sarangan sipa. Limbah te ewen due sama mimbit je intihe te akan bakas te.

      Kuan bawi bakas te : “Yuh, esu. Limbah tuh ketun due tulak akan dipah danau te. Lumpat ketun due maja uluh huma je silan danau te. Tuh ketun due tulak tuh ikau Putir Awi mangamburi, ikau Putir Busu melai benteng nahanan sarangan sipa tuh (sarangan sipa kuntep puat). Amun jadi sadia tulak ih ketun due esu”.

      Putir Awi mambesei, Putir Busu nahanan sarangan sipa. Dia pire katahi sampai ewen due te balalu malawak manjarat jukunga intu batang.

      Kanjera ewen due intu batang mahining atun auh uluh mantehau ewen due te manyuhu lumpat akan huma. Putir Busu lumpat mandai akan huma, mimbit sarangan sipa, Putir Awi lumpat kea.

      Putir Busu ewen due Putir Awi kilik-kilika mang-gau uluh je mantehau ewen due te. Ewen due balalu lumpat, sana sampai huma mite atun uluh bakas je dia  baramana ampi je mantehau ewen due te, mite balaue nyakukui uwan, baju kupi-kupit dia taurus. Putir Busu balalu munduk manukep Ongko Uwan te.

      Putir Awi mahalau ih, mahalau Ongko Uwan te, manuju karung lawang je mampan langawa.

      “Hau, tege bawi bahalap ampi tuh”, kuan uluh hatue bakena huang karung te, “ayu palus tame akan hetuh, tabarung tege ikau tuh ampi. En pahias ikau manduhup mampandui aku tuh ?”

      “Tau ih”, kuan Putir Awi.

      Kuan hatue bakena te hindai : “Hetu-hetuh ikau mampandui mamparasih makaian akangku tuh”.

      Putir Awi mampandui makaian hatue bakena te sambil hapander sarita, helat awi je baka ureh. Rami gura-gurak ewen due te tatawe hanja-hanjak. Kalute Putir Awi te bagawi hayak hureh dengan hatue bakena te.

      “Yuh, tambi”, kuan Putir Busu dengan Ongko Uwan te, “Narai je tau aku manduhup ikau embi, tau ih aku mangua”.

      “Aku tuh nah esu, tahi dia mandui, dia ulihku masip mampandui arepku. Awi te amun tege pasim dengangku esu, pandui aku tuh. En dia ikau bajilek mite aku je kuring kunyu tuh nah esu ? Kuntep kuring kuntep kitat”, kuan Ongko Uwan.

      “Narai je mawi aku kare manjilek ikau nah tambi, je ikei tuh kueh dia bakas kea jeha”, kuan Putir Busu bala-lu masip mampandui misut manyabun Ongko Uwan te.

      Tahi kea Putir Busu mampandui Ongko Uwan te, manakiri baju dengan tapih baju je beken. Limbah te ie manyarak manjambul Ongko Uwan te.

      “Rajin aku esu dengan uluh je kilau ikau tuh, dia kare bajilek dengan uluh bakas. Jahai uluh tabela je hakun kilau ikau tuh, masi manduhup kare kawan ongko. Yuh esu, tagal kataum dengangku, tuh aku handak mamungkus isut taluh tengangku akam. Bungkusan tuh esu, kareh intu huma harum tau mukei”,  kuan Ongko Uwan te hayak manenga ije bungkusan kurik akan Putir Busu.

      Hatue bakena nah manenga kea hadiah akan Putir Awi,  je hai tutu bungkusa. Hadiah te, kareh intu huma harun tau iukei. Limbah gawin ewen due nah uras jadi, te ewen due buli.

      Sana sampai huma Putir Awi dia sabar, ancap mambuka hadiah bara hatue bakena nah. Narai intu huang bungkusan te ?

      Baju rumbengan, tisin tanduk, cucuk konde tanduk, galang saling uras bara manas kare kambang keang dia baramana. Ngarutum Putir Awi mite panengan hatue bakena te.

      “Narai taluh tengan Ongko Uwan akam Putir Busu ?”, kuan kaka.

      “Hindai aku katawa, awi hindai aku mukei”, kuan Putir Busu.

      “Ukei helu Putir Busu, mangat itah sama mite”, kuan kaka tinai. Putir Busu mukei bungkusan hadiah bara Ongko Uwan. Narai intu huanga ?

      Sana Putir Busu mukei bungkusan hadiah Ongko Uwan te, mite nampayah ampin taluh huanga, tarewen Putir Busu.  Salenga mite taluh mamancar mangirap pancar pancara, sirau mata nampayah.

      Intu kotak bungkusan kurik te nah basuang : suwang, saling, galang, tisin, cucuk kunde, cucuk baju, uras bara amas bamata intan.

      “Lalehan ampin katu-ahum Putir Busu, tau Ongko Uwan dengam. Aku je hara-harap mite ampin hadiah je hai bungkusa bara hatue bakena te, tapi narai taluh huanga uras kare taluh dia barega. Narai atun regan je kare baju rumbengan, kare tisin, lasung, cucuk kunde je bara karam tanduk. Kambang keang kanduen itah hapa, baya mampaheka aku metu, baya paharap huang atei itah bewei”, kuan kaka.

      Awi te itah ela hengan amun kare uluh bakas itah harajur mampingat : ela itah je nampayah ampin kakena-kalinga, kahalap-kabungas uluh tapi riksa kilen ampin atei uluh te. Ela baya tapikat baya nampayah ampin je hila luar, tapi je perlu jete katulus–kasintan uluh te. 

      Sama kilau intu sarita tuh, amun itah manampayah Putir Busu tuntang Ongko Uwan tuh, ewen due tuh uras uluh-uluh je pamasi-bajenta-bajurah bahalap dasar hadat.

      Eweh Putir Awi tuntang hatue bakena te, ewen due te uluh je rajin suka rami, pander malayau jatun atun sinta huang ateie.

      Tuh keleh itah manduan  suntu Putir Busu tuh, ela manyuntu Putir Awi te. Uluh bakas Ongko Uwan je indu-hup awi Putir Busu te jete indu Sangumang, tokoh mitos uluh je pamasi panya-yang, masi uluh je bahalap atei.

      Hatue bakena te, jete tokoh rajan kalayau, rajan pambusau, rajan pambusik, rajan pambawi, rajan kadian, rajan katulas, rajan tanjaru, rajan peres tuntang rajan kapapa je beke-beken kea. Rajan kare kajuhu – rajan lecak uras aka.  *** 

Kutipan : Harian UmumDayak Pos

HANTELU  HUBAH

(Inyusun : A. F. Nahan)

     

      Bara hunjun batang bua mantawa, bakei manantuani ampin ulun belum. Tampayahe ewen te sanang tutu. Ewen melai huang huma tuntang bapakaian bahalap, kuman hapan piring sudu garpu.

      Tapi bakei belum masan hunjun edan kayu batiruh hete, buah ujan mandang handau hamalem. Panginae baya kare bua tuntang dawen kayu harayap.

      Amun metu basiak dumah, te ie hadari tuntang batahan intu hunjun kayu. Amun asu mite bakei  maka asu mangang ie tuntang handak mantakan ie, mampateie.                  

      Tapi ulun tau maharak metu basiak tuntang asu manumun auhe tuntang kare metu beken uras mikeh dengan ulun.

      Tagal jete bakei mipen jadi ulun, palus ie naharep Sambung Maut tuntang balaku ie tau mubah bakei te manjadi ulun.

      Sambung Maut manyuhu ie sewu danau tuntang maneser hete uju tingkat.

      Limbah ie malalus je te tuntang jakat hunjun petak, te salenga ie hubah manjadi ulun je bakena, bahalap ampin tampayah.

      Maka karen uluh je hasundau dengae rajin tutu, tapi papire katahi uluh mangejau arepe tuntang dia maku pakat dengae.

      Hadat bakei magun intu ie, ie te rajin bakaraen dengan ramun uluh, marusak mangana tuntang rajin baka-lahi. Jatun ati uluh tau mangamburi ampin  hadate  sampai uluh tau tahan baka-wal dengae.

      Sulak ie tau dengan kawale, tapi dia pire katahie, te ie mamparahas uluh hapan auhe atawa lenge.

      Uras uluh dia rajin dengae tuntang dia maku tukep ie. Beken bara je te harun ie mangkeme kapehen manggau duit akan balanja mamili panginan tuntang taluh hapa.   

      Kalute ie bapikir dia mangat manjadi ulun.  Tapi ie hengan mite ampin kamangat sadagar belum. Duit are, panatau kuntep huang huma je bahalap. Tuntang jipen tabela are je malalus kare auh parentah.

      Uluh are dumah bara hanjewu sampai hamalem dia kalayan manggau sadagar te. Karen uluh te uras manyewut arepe hakula dengan sadagar tuntang uras handak hakawal dengae.

      Jatun ati kapehe ampin tampayahe. Duit manggau duit, tuntang panatau manak panatau, tuntang sadagar jandau-jandau dia bagawi, mahapan pakaian lamus malisen.

      Maka ie haluli talih Sambung Maut tinai. Sinde tuh ie balaku uka iubah manjadi uluh tatau basewut, kilau ije biti sadagar hai. Sambung Maut manyuhu ie maneser tinai uju tingkat huang danau je helu.

      Sana ie lembut, te ie hubah jadi ije sadagar hai. Are panataue, jipen tabelae, kapal hai kurik hung batang taliae tuntang gudang kuntep ramun dagang.

      Te uluh are dumah talih ie semba-sembah dengae, balaku duhup dengan  kare  gawi  tuntang  uang duit.

      Macam-macam bewei urusan uluh dengan sadagar te, bara hanjewu sampai ambu alem uluh dia kalayan baurusan dengae. Tagal je te ie dia karuan tinai batiruh tuntang kuman belum.

      Atun bewei uluh dumah manegah humae, belahe urusan dagang, belahe urusan utang, tengah belah sual gawi.

      Beken bara te, puna hadate bakei, mina kakuhu tuntang dia mitung hak uluh beken tinai. Taluh handiai amun jadi tame lekae, uras ayue, uluh dia tau manduan je te tinai.

      Te lembut karidu dengan kawale badagang tuntang jatun ati kamangat auhe tandipah uluh je balaku duhup butang duit. Taharep uluh upaha ie kea dia haka-buah, awi ie handak untung are.

      Lembut are musuhe bewei tuntang kare kawan maling bigal harajur manderuh pikira handau hamalem. Kanateke ie dinun surat ancaman balaku duit bara uluh je dia ie kasene.

      Tuntang taharep uluh je ie dia sanang, ie harajur dia bahalap kutak dengan ewen. Genep andau harajur atun kalait tuntang karidu uluh dengan sadagar te.

      Kalute ie mangkeme dia mangat tinai manjadi sadagar. Ie peda dengan uluh baurusan je dia kalayan handau hamalem.

      Te ie mite raja belum sanang tutu. Uras uluh are manyembah katika raja mahalau. Jatun ati uluh je bahanyi malawan ie. Tagal je te lembut kipe handak manjadi raja.

      Ie manalih Sambung Maut, balaku ie iangkat manjadi raja. Sambung Maut manyuhu ie maneser uju tingkat tinai huang danau je sama.

      Lembut bara hete, salenga ie manjadi raja hung ije eka. Sana ie jadi raja maka uluh are dumah manalih ie baurusan maca-macam.

      Uluh are uras manyem-bah katika ie mahalau tuntang manyeneh auh ayue labih bara kare auh uluh beken. Sulak ia mangkeme sanang haliai. Tapi umbet katahie harun ie mangkeme rise tinai dengan uluh are.

      Janda-jandau sampai ambu alem jatun kalayan uluh manaharep ie, bau-rusan taluh kurik hai. Kanateke bentuk alem tampalawei atun manteri tuntang pangkalima perang mampisik ie, tagal watas karajaan inderuh awi musuh, atawa huang ije eka atun lembut karidu malawan raja tuntang pamarentaha.

      Beken bara kare acara resmi, are parawei akan raja je patut ie malaluse. Han-jewu je tuh ie manaharep acara mampendeng pabrik hai, limbah te atun acara mambuka palabuhan kapal hai, hamalem tinai atun acara ulang tahun angkatan perang. Uras balaku raja dumah tuntang manenga auh sambutan.

      Kalute rai-rai genep andau raja te belum, jatun ati tinai katika je dia ati gawie. Raja te harajur injaga awi uluh, kan kueh ie tulak tuntang atun, harajur atun uluh mangawal ie.

      Baya akan jamban  tun-tang batiruh bewei,  je jatun  uluh  tukep dengae. Ie peda dengan kare parawei uluh tuntang kare palakun uluh are kurik hai.

      Bara raja-raja beken atun pire-pire parawei tuntang auh je dia bahalap amun dia maku tumun auh lakun ewen. Are bewei je mangapehe tiruk tuntang manderuh tiruh kantuk.

      Te kajaria ie hadari manalih Sambung Maut uka tau inenga pambelum je sanang tuntang mangat, dia deruh dengan  maurus uluh are genep andau. Sambung Maut rahas mahining auhe te. Maka ie manyuhu raja te sewu danau tinai tuntang maneser uju tingkat. Sana ie lembut ... hubah haluli manjadi ije kungan bakei.

      Te kuan Sambung Maut : “Jadi telu kali aku manenga akam parubahan manumun kanahuangem. Tapi ikau mangkeme uras dia mangat. Jatun ati uluh belum je dia baurusan dengan uluh beken. Hadat bakei puna dia uluh marajie. Aluh huang kue-kueh eka atawa kilen ampi kagantung pangkat, uluh dia akan rajin dengan hadat kilau hadat bakei. Amun handak ihurmat, te raji-rajin man-duhup uluh. Amun handak tatau, te raji-rajin bagawi. Awi te je cucuk akam, ie te ikau haluli jadi bakei. Mangat ikau bebas tumun hadat bakei, tuyang tayun bara edan ije akan edan beken manggau panginan, dinun andau te lepah andau te kea”.

      Kalute bakei te manjadi bakei tinai tuntang belum na-huang kilau bakei bewei. *** 

Kutipan : Harian UmumDayak Pos

JAUN  AWI  KASARAKAH

 (Inyusun : Emma Mihing)

      Pasang pusak danum handalem, lepah kare tana nyelun uluh uras lelep. Tarahining auh bakatak mahiau awi leka lelep. Tarpaksa bakatak te balua bara rumbake.

      Ije kungan bakatak tarpaksa kumbang kamba manggau leka je lampang, dia lelep awi danum pasang pusak te. Kajuk-kajuka bakatak manggau panduku je lampang, balalu hindai ie sundau.

      Kalute bakatak te tatap kajuk-kajuka manggau am-pin leka je bahalap uka batahan pandehan mentai danum surut.

      Kanjera je kumbang kamba dari-daria te salenga dumah ije kungan handipe. Dia bakatak katawa je atun handipe intu tukep ie je kajuk-kajuka te, mandari arep bara danum pasang pusak te.  

      “Wah, panginan magah arepe tuh”, kuan handipe te. Handipe tukep jajalan tukep manukep bakatak te. Inutuk aka pain bakatak te, sukap manyulum. Leket tutuk handipe te.

      Kuan bakatak : “Kayah, kayah bagetu tulangku kareh. Tapi takan ih handipe nutuk bei, te mahin baya tulang bewei, takan ih amun ikau tau kuma”.

      Mahining auh bakatak kalute ragu handipe malalus gawie. Tutu kea auh bakatak, je leket intu tutuke te puna baya tulang ih.  Tepa parang-gang handipe nyama, pea dia pirrr tangkajuk bakatak balalu sahukan penda dawen.

      Kuan handipe : “Kueh ikau nah bakatak ?”

      Tumbah bakatak : “Tuh aku hetuh, tege ih aku hetuh”.

      Kuan handipe : “Balau kanaingku bakatak, aku handak kuman ikau”.

      Kuan bakatak : “Ceh ah handipe, narai guna ikau kuman aku kabuatku tuh, dia ulih mambesuh ikau. Keleh ikau manutuk je are”.

      Kuan handipe : “Tutu auhum bakatak, gau akangku kare jalaham je are te !”

      Auh bakatak : “Entai helu, aku manggau kare jalahangku akam handipe”.

      Kuan handipe : “Ela tahi bakatak, awi jadi balau angat kanaingku tuh”.

      Auh bakatak : “Entai hanjulu handipe, aku tuh tulak manggau jalahangku akam”. 

      Bakatak mansanan akan jalaha : “Intu hete tege handipe, ela itah akan hete. Keleh itah manggau eka itah manyahukan arep itah je aman”.

      Kawan bakatak mandari arep akan upun enyuh. Intu upun enyuh te are batuyuk upak enyuh tuntang bangu. Bakatak basahukan intu hete.

      Kuan bakatak je bakas : “Bingat ela bahanyi ridu, kareh tarahining awi handipe, lepah itah kina”. 

      Kuan handipe : “Lehan katahin bakatak tuh, palus jatun duma-dumah. Kareh ie keme angate, amun supaku ie, pateiku, kinangku dia aku manisa”. Handipe palus haguet manggau bakatak, kajaria sampai akan upun enyuh. Ras, ras auh usuk handipe hunjun sawut, hunjun bangu.

      Tambakas bakatak hamauh : “Ela ridu, ela ridu. Te hining ketun auh handipe hunjun bangu, hunjun upak enyuh  tuh”. Gura-gurak auh bakatak penda bangu.

      Hining awi handipe auh bakatak je gura-gurak penda bangu te. Gau gilau handipe, manggau intu kueh eka kawan bakatak te manya-hukan arepe.

      Handipe sene-seneh tuntang bilik balingau handipe manggau leka auh kawan bakatak te. Kajaria sundau kea awi handipe leka bakatak te manyahukan arepe.

      Kuan handipe : “Tuh ie, intu penda bangu tuh auhe, gura-gurak auhe tuh”.

      Bakatak manangkajuk bara penda bangu, mandari arepe bara handipe te. 

      Handipe manutuk hara-raha, jadi sampai kuntep nyama. Handipe marakang nyama handak manutuk bakatak je beken, bakatak je tege intu nyama balua bara nyama.

      Handipe manutuk baka-tak ngaju ngawa jatun kapana je kuman, awi handak dinun bakatak te je sampai lepah. Awi kakuhu mata, tepa jatun ije kungan bakatak je sampet kinan awi handipe. Awi handipe tiruke bakatak te sakalepah aka, tepa kajaria ije kungan mahin jatun dinu.

      Bakatak je jadi ulih lapas bara nyaman handipe nah, nangkeru nangkajuk mandari arepe akan eka beken je ianggap ewen aman. Rami bakatak kajuk-kajuka kasa-buran manggau leka je aman, ancap mandari arepe tame rumbak.

      Sangit   tutu   angat  han-dipe,  awi sampai ije kungan bakatak mahin jatun ulih dinu. Maka jadi tame nyama, tapi awi kasarakah handak manduan sakalepah, tepa je jadi tege intu nyama mahin uras manangkajuk mandari arepe.

      Awi te itah belum tuh ela lalau sarakah, kilau gawi handipe te. Tekap ije, tekap due, tekap sapuluh uras je bala-balang, kajaria arepem kabuat je rugi.

      Awi te amun tege gawi, aluh gawi te isut ampin hasile, amun je puna tutu-tutu manggawi batantu dinun kea hasile je naniha akan mambelum arep.

      Ela bagawi je tekap lapas tekap lapas sama kilau handipe tuh. Amun jadi dinun tekap ela malapase tinai. ***
Kutipan : Harian UmumDayak Pos